Donnerstag, 20. April 2017
Von Lukas und Tobi
A däm Morge esch d’Spannig scho am Morge ganz gross gsi: dr André het nämli Gebortstag gha ond so si mehr äuä närvöser aus är gsi, wo s’Martina eus das bim Wecke verrote het. Bim Morgetorne hei mehr denn metem Happy Birthday gstartet. Mehr hei trotz Gebortstag e asträngendi Tornstond gha; wobi s’asträngendste s’zämme zöue vo de Pönkt esch. Nächhär hets denn ou metem Probe agfange. Gspöut hei mehr zerst die beide Bands. Aschliessend esch en korzi Tutti Tutti Prob agstande und denne individuelles Üben. Ou die ganz Grosse si ned verschont worde und hei flissig Kiss me Kate giöbt.
Zom Zmettag hets gueti Hackbäueli met Hädöpfustock und Bohneböndeli gäh. D’Spannig het sesch dore ganz Tag dore zoge, do mehr gwösst hei, mehr döfe am Nomittag no fort. Mehr si denn met de Outos am haubi zwöi losgfahre ond hei de Nomittag underenander verbrocht. Die Einte si go minigolfe – was vöu Gedoud brucht het, gäu Köle – die Andere si chli go gänggerle. Am spötere Nomittag hei mehr üs ufe Wäg gmacht ond si denne met deliziöse Pizzene verwöhnt worde. Nachem Znacht hets denn nomou e trennti Prob vode bede Bands gä. Üsi liebe Dirigänte hei äuä gmerkt das mehr zemli erschöpft si gsi, se hei üs vonere witere Tutti Tutti Prob verschont; DANKE. 🙂 Zom Abschliesse vo däm Tag hei mehr denn nomou före André Happy Birthday gsonge ond wie sechs ghört, Chueche gässe.
